இறைவன் வகுத்து தந்த சனாதன தர்மத்தின்படி செயல்பட்டு தர்மத்திற்காக தங்கள் வாழ்க்கையை அர்பணித்துச் செயல்படும் தர்ம போராளிகள் அனைவருக்கும் வீர வணக்கம்.

தர்ம வீரர்களே! யுகா யுகங்கள் தோறும் யுகதர்மத்தை நிலைநாட்ட ஆதிமகாமூலத்து ஆதிநாராயணர் அவனியில் அவதரித்து அதர்மத்தை அழித்து தர்மத்தை ஸ்தாபித்து அருள்பாலித்து நமக்குத் தர்மத்தைப் போதித்து அவரிடம் போய் சேர வழிகாட்டுகிறார். இப்படி அவர் போதித்த தர்மமே சனாதன தர்மமாகும். அச் சனாதனதர்மமே இந்து சமயம், சனாதன தருமம், வேத சமயம், வைதீக சமயம், அய்யாவழி போன்ற பல்வேறு பெயர்களால் அழைக்கப்படுகிறது.

சனாதன சமயம் என்றால் அழிவில்லாத, நிலையான அறம் எனப்படும். இது வேதங்களை அடிப்படையாக கொண்டு இயங்குவதால் வேத சமயம் என்றும். வேதநெறிகளையும் சாத்திரங்களையும் மையமாகக் கொண்டுள்ளதால் வைதீக சமயம் என்றும் அழைக்க படுகிறது.

முந்தைய யுகங்களில் இருந்த அசுரன் சனாதன தர்மத்தையோ அல்லது சனாதன தர்மத்தின் ஆகமங்களையோ ஒன்றும் செய்யவில்லை. அதைப் பின்பற்றுபவர்களை மட்டும் துன்ப படுத்தினான். ஆனால் இக் கலியுகத்தில் தோன்றிய கலியனான அசுரனோ சனாதன தர்மத்தை அழிக்க வேண்டும் என கங்கணம் கட்டி ஆகமத்தைக் கூறழித்தான்.

போலியான கட்டுக்கதைகளைப் புகுத்தினான். அறியாமை மூடநம்பிக்கையை விதைத்தான். சாதிய ஏற்ற தாழ்வுகளை ஏற்படுத்தினான். இதனால் மக்கள் ஒருவருக்கொருவர் சண்டையிட்டுக் கொண்டனர். இப்படிப்பட்ட மோசமான காரியங்களை ஏற்படுத்தியது சனாதன தர்மம் என்று பொய் பிரச்சாரம் செய்தான்.

சனாதன தர்மத்தை அழிக்க மாற்று மதங்களை இக் கலியுகத்தில் உருவாக்கிக் காட்டினான் கலியன். இச் சூழ்ச்சியில் சனாதன தர்மத்தைப் பின்பற்றும் மக்களே அகப்பட்டனர். தங்கள் தாய் தர்மத்தை மறந்து பணத்திற்காக கலியன் உண்டுபண்ணின மாற்று மதங்களை நாடினர். நாடினது மட்டுமல்லாமல் தங்கள் தாய் தர்மமான சனாதன தர்மத்தையே இழிவாக பேசினர்.

இப்படி இக்கலியுகத்தில் தர்மமும் பாதிக்கப் பட்டது தர்மவான்களும் பாதிக்கப் பட்டனர். இதைப் பார்த்த பாரளந்த பெருமாள் நாராயணர் ஆதி வைகுண்டமாக கொல்லம் ஆண்டு 1008 மாசி 20 ஆம் தேதி திருசெந்தூர் திருப்பாற் கடலினுள் அவதரித்து தருவை கரையில் மனு சொரூபம் காட்டி தெச்சணம் எழுந்தருளி மக்களை ஒன்றுதிரட்டி தான் யார் என்பதை வெளிப்படுத்தி மக்களுக்கு விவேகத்தையும் ஞானத்தையும் ஏற்படுத்த அகிலத்திரட்டு அம்மானை என்னும் வேத ஆகமத்தை அருளி ஆதி சானாதன தர்மத்தைக் காட்டினார்.

சாதி இல்லை பேதம் இல்லை ஏற்றத் தாழ்வுகள் இல்லை ஒன்றே குலம் ஒருவனே தெய்வம் என்ற உண்மையை உணர்த்தி கலியன் பெற்ற வரங்களை அழித்து அவனை ஒன்றும் இல்லாதவன் ஆக்கி மக்களை எல்லாம் சான்றோர் ஆக்கி கலியனால் விதைக்கப் பட்ட விசச் செடிகளை அறுத்து எறிய வழிகாட்டி மக்களைப் பார்த்து நீங்கள் கூலிக்கார மக்கள் இல்லை கோடி வரிசை பெற்ற மக்கள் என்று தங்களின் பயணத்தை உணர்த்தி தர்மம் வளர வழிவகை செய்து நல்லவர்களைத் தெரிந்தெடுக்க பொய் சொரூபம் ஒன்றனுப்பி வைகுண்டத்தில் பள்ளி கொண்டார்.

அன்பானவர்களே! இப்போது இங்கு நடக்கும் தீமைகளுக்கு கலியனோ அல்லது அவன் பெற்ற வரங்களோ அல்ல காரணம் நாராயணம் வைகுண்டமாக அவதரித்து அவன் பெற்ற வரங்களை அழித்து அவனை நடை பிணமாக்கினார். எனவே இப்போதைய தீமைகளுக்குக் காரணம் கலியனும் வெண்நீசனும் விதைத்த விதைகள் மற்றும் நம் மனதில் படித்துள்ள ஆறு அகப் பகைகளே காரணம்.

இதை உணர்ந்து பெரிய அதர்மவானாகிய கலியனிடம் இருந்து விடுதலை பெற்று தந்த நமது தாய் தந்தையாகிய அய்யா வைகுண்ட பரம்பொருளுக்கு நன்றி சொல்லி அவர் வகுத்துத் தந்த ஆகம நெறிமுறைகளை தவறாது பின்பற்றி ஐம்புலன்களைக் கட்டுப்படுத்தி ஆறு அகப்பகைகளை வெல்வோம்

உலகத்தின் முன்னோடிகளாக திகழ்ந்து கலியன் விதைத்த விசச் செடிகளை அறுத்து சனாதன தர்மத்தின் உண்மைத்தன்மையை உலகுக்கு உணர்த்தி எல்லா ஜீவாத்மாக்களையும் தன்னிலையை உணர வழிகாட்டி தாய் தர்மமான சனாதன தர்மத்தைப் பின்பற்றாதவர்களைத் தாய் மதம் திரும்ப வழிவகை செய்து உலக ஜோதிகளாக ஜொலித்து எல்லோரையும் பிரகாசிக்க வைத்து வாழ்ந்து காட்டுவோம்

1. சான்றோர்கள் பிறந்த இடம்?

2. ஐபேரின் பத்தினி யார்?

3. தேவகிக்குத் திருமணம் நடைபெறக் காரணமாக இருந்த முனிவர் யார்?

4. சான்றோர்களுக்கு முதல் பெயர் வைத்தது யார்?

5. சான்றோர்களுக்குத் தாலாட்டு பாடியது யார்?

விடை 9 பக்கம் பார்க்கவும்

சிங்கமுகாசூரன் திரள் சூரபற்பன் ஆகிய இரு அசுரர்களும் கந்தசுவாமி மூலம் தூதுக்கு வந்த தூதுவரான வீரபாகு தேவரிடம் தங்கள் பராக்கிரமங்களைச் சொல்லுகின்றார்கள்.

சிவபெருமான் முதற்கொண்டு எங்களுக்கு இடம் கொடுத்து அவருக்கு இருக்க இடமில்லாமல் நாராயணரிடம் தஞ்சம் அடைந்ததைச் சொல்லி முப்பது முக்கோடி தேவர்கள் என்று சொல்லக்கூடிய எல்லா வகைப்பாட்டு தேவர்களும் ரிஷிகளும் இப்போது நாங்கள் சொல்லும் சொல்படி கேட்டுத்தான் நடப்பார்கள் அப்படிப்பட்ட வலிமை பொருந்தியவர்கள் நாங்கள் இப்படிப்பட்ட பராக்கிரமங்களைக் கொண்ட எங்களைப் பற்றி நீ கேள்விப்பட்டதில்லையா? அப்படிக் கேள்விப் பட்டிருந்தாயானால் ஆண்டி பண்டாரமாகிய கந்தனுக்காக நீ தூது வந்திருப்பாயோ? என்று தூதுவனைப் பார்த்து இகழ்ச்சியாக பேசுகிறார்கள்.

எங்களை ஏதோ சிறியவர்களாக பலத்தில் குன்றியவர்கள் என்று நினைத்து விடாதே; எங்களுடைய சிரசையும் எங்கள் உடல் அமைப்பையும் பார்த்தபின் எங்களை சாதாரணமாக எடை போடாதே? உன்னை இங்கே எங்களிடம் தூதுக்கு அனுப்பிய கந்தனைப் பற்றி எங்களுக்குத் தெரியும். அவன் அளவும், அவன் பலமும் எங்களுக்குத் தெரியும். இனி எங்கள் பலத்தினை நீ அறியத்தான் போகிறாய் என்று தூதுவனிடம் சூரர்கள் கூறினார்கள். கந்தபெருமானின் ஆண்டி தோற்றத்தைப் பார்த்து சூரர்கள் தவறாக கணக்கிட்டு இவ்வார்த்தையைத் தூதரிடம் கூறினார்கள்.

எல்லா யுகங்களிலும் தன் உண்மையான சக்தி நிலையை இறைவன் வெளிப்படுத்தாமல் சாதாரண தோற்ற நிலையில் அவதாரம் செய்வதால் இறைவன் பலத்தினை அசுரர்கள் உணர்வதில்லை. அப்படித்தான் கந்தபெருமானின் உண்மை பலத்தினை அறிய முடியாத சூரர்கள் அவர் தோற்றமான பண்டார வடிவத்தைக் கண்டு இவர் சாதாரணமானவர் என்று சூரர்கள் எண்ணினர்.

இப்படி சூரர்கள் தங்கள் பராக்கிரமங்களைத் தூது வந்த தூதனிடம் விளக்கிக் கூறிய பின், நாங்கள் கூறிய எங்கள் பலங்களையும் ஆங்காரங்களையும் உன்னைத் தூதுக்கு விட்ட கந்தனிடம் போய் சொல் என்று தூதுவனிடம் எகத்தாளமாகச் சொன்னார்கள். இப்படி மதமாக பேசிய அந்த இரு அசுரர்களிடமும் எந்தவித பயமும் இன்றி தாழ்ந்து நில்லாமல் அவர்கள் எப்படி அவர்களது பராக்கிரமங்களைச் சொன்னார்களோ அதுபோலவே கந்தசுவாமியின் பராக்கிரமங்களைத் தூதுவர் சொல்லலாயினர்.

இப்படிக் கந்தசுவாமியை இகழ்த்தியும் தங்கள் பலன்களை உயர்வாகவும் பேசிய இரு அசுரர்களிடம் தூதுவரான வீரபாகுதேவர், நீதானோ எங்கள் நிமலன் என்று சொல்லக்கூடிய அனைத்தையும் தாண்டிய இறைவனுக்கு எதிரி? எங்கள் இறைவனுக்கு எதிரி என்று ஒருவன் இருக்க முடியுமா? அப்படி எதிரியாக நீ உன்னை பாவித்தாயானால் உன்னை வதைத்து, உன் உடலைக் கூட மற்றவர்களுக்குக் கிடைக்காமல் நாய் நரிகள் பிய்த்துத் தின்று, பிணம் தின்னும் கழுகுகளுக்கு இரையாக உன் உடல் செல்லும்படி எங்கள் கந்தசாமி செய்வார். அதற்காகவே உன்னை வதைப்பதற்காகவே வேலாயுதம் கொண்டு அவர் வந்திருக்கிறார் என்று வீரபாகுதேவர் சூரர்களுக்குப் புத்தியை கூறுகின்றார்.

மேலும் வீரபாகு தேவர் சூரர்களைப் பார்த்து கூறுகின்றார்; சூரர்களே உங்கள் பராக்கிரமங்களை நீங்கள் உயர்வாகக் கூறுகின்றீர்கள். ஆனால், எங்கள் ஆறுமுக வேலவனார் போருக்கு வந்தால் நீங்கள் சிறைப்படுத்தி வைத்திருக்கக் கூடிய தேவர்களுடைய சிறையையும் அதுபோல தெய்வ மடவார்கள், மேல் உலகத்தாராகிய எல்லோர் சிறையையும் அகற்றி உங்களுடைய படைபட்டாளங்கள் அத்தனையையும் அழித்து, நீ உண்டு பண்ணி வைத்திருக்கக் கூடிய கோட்டை கொத்தளங்கள் அத்தனையையும் அழித்து ஆறுமுக வேலவனாக அரசாள்வார் என்று சூரர்களுக்கு எச்சரிக்கும் விதமாக தூதுவரான வீரபாகுதேவர் கூறினார்.

இப்படி வேலாயுத பெருமாளுடைய வீரத்தைச் சொல்லிய பின்பும், தூதுவன் சொன்ன புத்தி உபதேசங்கள் சூரர்களுக்கு ஏறவில்லை. அவர்கள் போர் செய்வதிலேயே குறியாக இருந்தார்கள். தூதுவரைப் பார்த்துச் சூரர்கள், “நீ சொன்ன எல்லாவற்றையும் நாங்கள் அறிவோம்”‘ நீ உன் கந்தசுவாமியைப் போருக்கு வரச்சொல் என்று தூதுவந்த தூதனை அனுப்பினார்கள். தூதுவரும் விரைவாக ஓடி வந்து சூரர்கள் சொன்ன எல்லாவற்றையும் கந்த சுவாமியிடம் கூறினார்.

தூதுவன் வந்து கந்தசுவாமியிடம் சூரர்கள் சொல்லிய செய்தியைச் சொல்லிய உடனேயே கந்தசுவாமி மனம் மகிழ்கின்றார். ஏனெனில் இந்த அசுரர்கள் தங்கள் வாயினாலேயே, தங்கள் எண்ணத்தாலேயே தங்கள் அழிவினை தேடிக் கொண்டார்கள். எனவே இப்போதே போர் செய்து இவர்களை அழிக்க வேண்டும் என்ற எண்ணம் கொண்டு சூரர்களை அழிப்பதற்காக வேலாயுதத்தைக் கையில் எடுத்தார். வேதமறையோர்களைத் தன் படைவீரர்களாகக் கொண்டு மாயவரான நாராயணர் சூரர்களை அழிக்கும் பொருட்டு கந்தனார் வேஷம் கொண்டு சூரர்களை அழிப்பதற்காக படைக்களத்துக்கு வந்தார். எப்போது சூரர்களை அழிப்பதற்காக எம்பெருமான் போர்க்களத்துக்கு வந்தாரோ அப்போதே சூரர்களின் வலிமை குன்றியது.

கந்தசுவாமி படையெடுத்து வந்த உடனேயே சூரர்கள் போருக்கு தயாராகி, அணிவகுத்து வந்தார்கள். இப்படி சூரர்களையும் அவர்கள் படையையும் கண்ட உடனேயே, ஆதிப் பரம்பொருளாகிய நாராயணமூர்த்தி இவ்வுலகத்தில் தான் இந்த சூரர்களை வதைக்க வேண்டும் என்று பண்டார வேஷம் கொண்டு வந்ததன் காரணமாக இந்தச் சூரர்களை போர் செய்து அழிக்க போகும் முன் தானே புத்தி உபதேசத்தைக் கூறலாம் என்று சூரர்களைப் பார்த்து புத்தி உபதேசங்களைக் கூறலானார்.

(தொடரும்)

அய்யா உண்டு

நமது அகில உலக அய்யாவழி சேவை அமைப்பு (IASF) நடத்தும் கூகுள் மீட் அகிலத்திரட்டு அறப்பாட சாலை எல்லா சனிக்கிழமையும் இரவு 8 மணி முதல் 9 மணி வரை நடைபெறுகிறது.

எனவே அப் அறப்பாடசாலையில் கலந்து கொள்ள எல்லா சனிக்கிழமையும் கீழ் கண்ட லிங்கை கிளிக் செய்து இணைந்து பயன் பெறுங்கள் https://meet.google.com/btd-zzjs-uph. இந்த வகுப்பில் திருஏடு வாசிப்பு, பாராயணம், ஆன்மிக கதை, அய்யா பாடல், அய்யாவின் உபதேசங்கள் போன்றவை அன்பர்களால் சிறப்பாக வழங்கப்படுறது. அன்புக்கொடி சொந்தங்கள் இந்த ஆன்மிக வகுப்பில் கலந்து பயனடைய அன்போடு வேண்டுகிறோம்.

அய்யா உண்டு

இறைவன் நம் கண்ணுக்கு புலப்படுவரா என்று நம்மில் பலருக்குச் சந்தேகம் இருக்கும். அதற்கு விடை தரும் கதையே இது. ஒரு கிராமத்தில் விவசாயி ஒருவர் தன் மனைவியுடன் வாழ்ந்து வந்தான். விவசாயி பிறருக்கு உதவுவதில் அதிக ஆர்வம் உடையவர். அது மட்டுமின்றி சிறந்த தெய்வ பக்தி உடையவர். ஆனால் இவருடைய மனைவி ஒரு பேராசை கொண்ட சுயநலவாதி தன் கணவரிடம் அடிக்கடி சண்டை போட்டுக் கொண்டே இருப்பாள்.

ஒரு நாள் அந்த விவசாயி அனைத்து வேலைகளையும் முடித்துவிட்டு தூங்குவதற்குச் சென்றார். அப்பொழுது இறைவன் அவர் கனவில் தோன்றி நாளை உன் வீட்டிற்கு வருவேன் என்னை எதிர்பார்த்து இரு என்று கூறினார். இதைக் கேட்ட விவசாயி மிகுந்த மகிழ்ச்சியுடன் தன் மனைவியை எழுப்பி செய்தியைக் கூறினார். உடனே அவளும் இறைவன் வந்தால் ஆடை நகை மாளிகை கேட்க வேண்டும் என்ற பேராசையுடன் இருந்தாள்.

ஆனால் அந்த விவசாயி இறைவனை எப்படி உபசரிப்பது என்று எண்ணிக் கொண்டே விடிவதற்குள் சமையலுக்கு வேண்டிய பொருட்களுடன் பழங்கள் வாங்கி வந்தார். இருவருமாக சேர்ந்து சமையல் வேலைகளை முடித்துவிட்டு இறைவனுக்காகக் காத்திருந்தனர்.

மேலும் விவசாயி இறைவன் தரையில் இருந்து உணவு அருந்தினால் உடம்பில் தூசிப் பட்டுவிடும் என்பதற்காக ஓர் உயர்ந்த கம்பளியும் இறைவனுக்குப் புதிய ஆடையும் எடுத்து வைத்திருந்தார். வெகு நேரம் ஆகியும் இறைவன் வரவில்லை. இருவரும் வழி மேல் விழி வைத்துக் காத்திருந்தனர்.

அப்போது தூரத்தில் ஓர் உருவம் தென்பட்டது அது பக்கத்தில் வரும்போதுதான் அவர் ஒரு பிச்சைக்காரன் என்பது தெரிந்தது. அந்தப் பிச்சைக்காரன் விவசாயி இடம் உணவு கேட்டார். விவசாயியும் எந்தத் தயக்கமும் இன்றி இறைவனுக்காக அமைக்கப்பட்ட உணவை பிச்சைக்காரருக்குப் பசி தீரக் கொடுத்தார். அவரும் பசியாறிச் சென்றார். ஆனால் விவசாயி மனைவி அவரைத் திட்டிக் கொண்டே இருந்தாள்.

அதற்கு அடுத்ததாக மதிய வேளை ஒரு விதவைப் பெண் கையில் குழந்தையுடன் வந்தாள். மேலும் தனக்கு உதவ யாரும் இல்லை என்றும் தன் குழந்தையை வளர்க்க உதவுமாறும் கேட்டாள். விவசாயி இறைவனுக்காக வைத்திருந்த உண்டியலை அப்பெண்ணுக்குக் கொடுத்து என்னை உன் தந்தையாக நினைத்துக் கொள் உனக்கு என்ன உதவி வேண்டுமானாலும் என்னிடம் கேள் என்று இரக்கத்துடன் ஆறுதல் வார்த்தைகளைக் கூறி அனுப்பினார்.

மாலை வேளையாகியும் இறைவன் வரவில்லை அப்போது ஒருவர் ஆடை முழுவதும் சேறுடன் விவசாயி வீட்டுக்கு வந்தார். மேலும் தான் தொழில் அதிபர் என்றும் சேற்றில் தவறுதலாக விழுந்து விட்டதாகவும் ஆடை வாங்க அருகில் கடை இல்லை என்றும் கூறினார். உடனே விவசாயி இறைவனுக்காக வாங்கி வைத்திருந்த ஆடையை அந்தத் தொழில் அதிபருக்குக் கொடுத்தார். அதற்குப் பதிலாக தொழிலதிபர் பணம் கொடுத்தும் மனைவி வாங்குமாறு கட்டாயப்படுத்தியும் இவர் வாங்கவில்லை.

இரவு வேளையாகியும் இறைவன் வராததால் சோர்வாக இருவரும் இருந்தார்கள். அப்போது ஒரு முதியவர் குளிரில் நடுங்கியபடி வந்தார். விவசாயி அவருக்கு மீதம் இருந்த உணவையும் இறைவனுக்கு வாங்கி வைத்திருந்த கம்பளியையும் கொடுத்து அனுப்பினார். ஆனால் அவரின் மனைவியோ இறைவனுக்காக வைத்திருந்த பொருட்களைத் தானம் செய்த காரணத்தினால் தான் இறைவன் வரவில்லை என்று சண்டையிட ஆரம்பித்தாள். மேலும் இறைவன் வராத காரணத்தினால் இருவரும் வருத்தமாகத் தூங்கச் சென்றனர்.

அப்போது விவசாயின் மனைவியின் கனவில் இறைவன் தோன்றினார். உடனே அவள் இறைவா என் கணவன் தங்களுக்காக வைத்திருந்தவற்றைப் பிறருக்குக் கொடுத்த காரணத்தினால் தான் நீங்கள் வரவில்லை என்று எனக்குத் தெரியும் அவரை மன்னியுங்கள் என்று வேண்டினாள். அதற்கு இறைவன் நான் நான்கு முறை உங்கள் வீட்டிற்கு வந்தேன். உன் கணவரும் என்னை நன்றாக உபசரித்து அனுப்பினார். அதற்கு நீயும் அவரைத் திட்டினாயே என்று கூறினார்.

இவளுக்கு ஒன்றும் புரியவில்லை அப்போது இறைவன் நான் பிச்சைக்காரனாக, விதவை பெண்ணாக, தொழில் அதிபராக, முதியவராக வந்தேன் என்றார். உடனே அவளின் கண்களில் நீர் வடியத் தொடங்கியது தன் தவறை உணர்ந்து மன்னிப்புக் கேட்டாள். கனவு முடிந்ததும் தன் கணவரிடம் நடந்ததை பற்றி கூறினாள். இருவரும் இறைவன் தங்கள் வீட்டிற்கு வந்தார் என்று மனநிறைவுடன் இருந்தார்கள்.

அன்பானவர்களே இக்கதை போன்று தான் இறைவன் எப்படி நம்மை சந்திக்க வருகிறார் என்பது நமக்குத் தெரியாது. ஆனால் நிச்சயம் ஒருநாள் வருவார். “எண்ணத்துலையாத ஏது சொருபமதும் கண்ணிமைக்கும் முன்னே கனகோடி செய்வோனே”. இந்த அகிலவரிக்கு இணங்க எப்படிப்பட்ட சொருபத்திலும் இறைவன் வருவார். நாம் செய்கின்ற ஒவ்வொரு தரும செயலிலும் இறைவனை நாம் காணலாம். இறைவன் நம் உள்ளத்தில் தான் இருக்கிறார்.

அய்யா உண்டு

1. அரிகோண மாமலையில் அயோத அமிர்த கங்கை

2. துரோபதை

3. நாரதர்

4. அரன் (சிவன்)

5. சரஸ்வதி

அய்யா உண்டு

பல கடைகள், வாகனங்களின் பெயர் பலகைகளில் அய்யாதுணை என்று எழுதி இருப்பதைப் பார்க்கும் போது மனம் மகிழ்ச்சி அடைந்தாலும் இது சம்பந்தமாக சில விசயங்கள் மட்டும் ஏனோ மனதில் தர்மச் சங்கடத்தை ஏற்படுத்துகிறது.

அய்யாவழியின் மிக முக்கியமானவராக தன்னை நிலை நிறுத்திக் கொண்டிருக்கும் ஓர் அன்பர் அய்யாவின் மீது மிகவும் பக்தியானவர். அய்யாவின் மீது நீங்கா அன்பை வைத்திருப்பவர். அவர் என்னதான் சுத்த சைவமாக இருந்தாலும் அவர் வைத்து நடத்தும் உணவகம் ஒன்றில் ‘அய்யா துணை’ என்று கொட்டெழுத்தில் எழுதிய அவர் அதன் கீழே “அசைவ உணவகம்” என்று எழுதி அசைவ உணவை அனைவருக்கும் பரிமாறி வருகிறார். இது அவருக்கே முரண்பாடாக தெரியவில்லையா? அவருக்கு நெஞ்சு உறுத்தவில்லையா? அவர் செய்யும் தீச்செயலுக்கு தனக்குத் துணையாக அய்யா வருவார் என்ற நெஞ்சுரம் எங்கிருந்து வந்தது அவருக்கு?

என்ற வாசகத்தை அவர் மறந்தாரோ? ஓர் உயிரினத்துக்கு ஒரு வேளை உணவளிக்க தவறுவதையே பாவம் என எச்சரிக்கிறார் அய்யா. ஆனால் அது போன்ற உயிரினங்களைக் கொன்று உணவகம் நடத்தி உணவளிப்பது எப்பேர்ப்பட்ட பாவம். உணர்வார்களா இது போன்றவர்கள்.

இவர் அப்படி என்றால் இன்னும் ஒருவரோ கறிக்கடை வைத்து நடத்துகிறார். இவர் நடத்தும் கடையின் பெயரை “அய்யா கோழிக்கறிக் கடை” என்று வைத்துள்ளார்.

என்று இந்த வாசகத்தை அய்யா, ஐந்து அறிவு மற்றும் அதற்கும் கீழான அறிவு கொண்ட உயிரினங்களும் கூட பின்பற்ற வேண்டிய தர்ம மொழியாக அவைகளுக்குச் சொன்னார். ஐந்து அறிவு ஜீவராசிகளுக்கே அய்யா, மிருகங்களைக் கொன்று உண்ணாமல் புல்பூண்டு போன்ற தாவரங்களை உண்டு வாழ தர்ம மொழி உபதேசிக்கும் போது பகுத்தறிவு இருந்தும் ஆறறிவு மனிதர் அதை அறியாது தவறு செய்து கொண்டு இருப்பதேனோ? அவர் செய்யும் பாவ செயலுக்கு அய்யாவை துணைக்கு அழைப்பதேனோ?

தயவு செய்து அன்பர்களே, நாம் செய்யும் பாவச் செயல்களுக்குத் துணை வேண்டுமெனில் அய்யாவை துணைக்கு அழைக்காதீர்கள்… ஏனெனில் நமது அய்யா சற்று வித்தியாசம் ஆனவர். அவர் தாய்தமர் என்றும் தமது கிளைகள் என்றும் பார்ப்பவர் அல்ல. சத்தியத்திலும் தர்மத்திலும் யார் யார் வாழ்கிறார்களோ அவர்களுக்குத்தான்

“அய்யா துணை”. தர்மமதில் உறையும் பொறுமை குல தீரன்” ஆன அய்யா வைகுண்டரின் வழியில் இருக்கும் நமக்குத் தர்மம் மற்றும் சத்தியம் மிகமிக முக்கியம். ஆகவே இது போன்ற செயல்களுக்குப் பெயர் பலகைகளில் அய்யாவின் நாமத்தைப் பயன்படுத்தாதிருப்பது நலம்.

இறைவனிடம் சிந்தையை வைத்து இறையருள் பெறுவது தவமாகும். தியானம் என்பது முதல் நிலை. தவம் என்பது இறுதிநிலை. தியானம் என்பது தன்னை அறியும் நிலை. தவம் என்பது இறைவனை அறியும் நிலை.

தன்னுள் மறைந்துள்ள மெய்ப்பொருளை அடைய விடாமுயற்சி மூலம் செயல்படுவது தவம். தவத்தில் வெற்றி பெற்ற மனிதர்கள் தெய்வமாக போற்றப்படுகின்றார்கள்‌. தவத்தின் மூலம் அட்டமா சித்துகளைப் பெற்று மனித உடலில் வாழும் போதே அற்புத அதிசயங்களை நிகழ்த்துகிறார்கள். இது தவத்தினால் கிடைக்கும் பலனாகும். அட்டமா சித்துகள் எட்டு வகைப்படும். இதைப் பற்றி திருமூலர் கூறும் போது

என்று பாடுகின்றார். அதாவது இறைவனோடு பொருந்தி நிற்கின்ற தவத்தைச் செய்து ஒலிக்கின்ற பரநாத வடிவாகிய திருவடியைக் கண்டேன். நீண்ட காலம் தவம் செய்து சிவகதியைக் கண்டு கொண்டேன். உடல் மறந்து உணவு மறந்து இருப்பதே தவம். இவ்வுலக இன்பத்தை நாடி செய்வது தவம் அல்ல. இறை தரிசனம் பெறுவதே தவம் என்பதாகும்.

அய்யா வைகுண்டர் அருள் நூலில் தவத்தைப் பற்றிக் கூறும் போது

என்று அய்யா வைகுண்டர் நமக்குக் கூறுகின்றார். கலிமாயையானது மனிதனைப் பரகதி அடைய விடாமல் ஆசை என்கிற மோகத்தைக் காட்டி பலவிதமாக மனதைக் கெடுக்கிறது. எனவே நீங்கள் மரணமில்லா நித்திய வாழ்க்கை என்கிற தர்மயுக வாழ்வு வாழ வேண்டும் என்றால் பரம்பொருளை நினைத்து கடும் தவம் செய்ய வேண்டும்.

இந்த உண்மையை நான் மறைக்காமல் உங்களுக்கு உபதேசமாக சொல்லுகிறேன் என்று அய்யா நமக்குக் கூறுகின்றார். சிவஞான அறிவைப் பெற்ற நான் உங்களுக்குப் பிழைத்துக் கொள்ளும் வழியைச் சொல்லிவிட்டேன். நீங்கள் தவம் செய்யாமல் வேறு எந்த வழியிலும் கர்ம வினைகளை வெல்ல முடியாது. என்னுடைய பிள்ளைகளுக்கு நான் ஞானஅறிவை சொல்லிவிட்டேன். விருப்பம் உள்ளவர்கள் ஏற்றுக் கொள்ளுங்கள் என்று உபதேசமாகக் கூறுகின்றார்.

கலியுக மக்களாகிய நமக்குத் தவம் சாத்தியமா? தவத்தினால் பலன் கிடைக்குமா? என்றால் நிச்சயமாக கிடைக்கும். ஏனென்றால் இப்போது பிறவி எடுத்துள்ள மக்கள் நன் மக்களே ஆனாலும் கலியில் சிக்கி தவிக்கின்றார்கள். கர்த்தாவை நோக்கி கடுந்தவங்கள் நாம் செய்தால் புத்தியும் திருப்தியாகிய நிறைவும் வரும்.

தவ வலிமையால் மனிதன் ஆறாவது அறிவிலிருந்து ஏழாவது அறிவாகிய பேரறிவுக்குக் கடந்து சென்று பேரின்ப நிலையை அடைய முடியும். தவம் என்பது சிவநிலையை அடைதல்.

தவத்தை நினைத்து யாரும் பயப்பட வேண்டிய தேவையில்லை. நாமும் சிவகதி அடைந்து நாராயணப் பரம்பொருளோடு ஐக்கியம் ஆகலாம். நமக்கு அட்டமா சித்திகள் தேவையா என்றால் அவைகள் நமக்குத் தேவையில்லை. நமக்கு அய்யா வைகுண்டரின் இறை ஞானசித்தம் மட்டும் போதுமானது. எனவே தவம் செய்து பரகதி பெறுவோம்.

அய்யா உண்டு

பொறுமை என்பது நமக்குத் துன்பம் ஏற்படும்போது உணர்ச்சி வசப்படாமலும், கோபம் கொள்ளாமல் இருக்கும் நிலையாகும். மற்றவர்கள் நம்மை இகழும் போதும், நீண்ட தாமதங்கள் ஏற்படும் போதும், பிரச்சினைகள் ஏற்படும்போதும், தொடர் துன்பங்கள் வரும்போதும், சில அசாதாரண சூழ்நிலைகளில் அமைதியாக இருக்கும் குணமாகும்.நம்முடைய வாழ்வில் பல சாதனைகள் நிகழ்த்துவதற்குப் பொறுமை அவசியம் ஆகிறது. நாம் பொறுமை என்பது சோம்பேறித் தனம் என்று நினைத்துவிடக்கூடாது. பொறுமைதான் ஒரு மனிதனின் மன உறுதியையும் துணிவையும் தரும்.

எப்படி என்றால் நாம் பொறுமையோடு பல விஷயங்களை ஆராய்ந்த போது அது நமக்குப் பல வெற்றிச் சாதனைகளைத் தருகிறது .நாம் பொறுமையுடன் நன்மை தீமைகளைப் பற்றி அலசி ஆராய்ந்து செயல்படுத்துகின்ற எந்த செயலும் நமக்கு வெற்றியைத்தான் தரும் .ஒரு சிற்பி அழகான சிலையை வடிக்க அல்லது செதுக்க வேண்டும் என்றால் அவரிடம் பொறுமை அவசியம் இருக்க வேண்டும். அப்போதுதான் அந்தச் சிற்பியால் ஒரு சிலையை அழகாகச் செதுக்க முடியும். நம்முடைய சிந்தனையும் சிறப்பானதாக அமைய பொறுமை அவசியம்.

பொறுமை கடலினும் பெரிது என்பார்கள். வற்றாத கடலைவிடப் பொறுமை பெரியது என்றால் பொறுமையின் சிறப்பு எத்தகையது என்பதை நாம் உணரவேண்டும். நாம் சாதிப்பதற்கு அறிவுடன் பொறுமை இருக்க வேண்டும்.

அறிவு என்பது நன்மை தீமைகளைப் பிரித்துப் பார்ப்பதற்குத் திறக்கின்ற ஓர் உணர்வின் திறவுகோல். பொறுமை அந்த உணர்வின் திறவுகோலாக விளங்குகிறது. ஒருவரிடம் ஆணவம் என்ற காற்று வீசினால் கோபம் என்ற சுனாமி சுழன்றடிக்கும். அப்போது அழிவு கோபப்படுபவனுக்கு மட்டுமல்ல. கோபப்படுகிறவனைச் சார்ந்த சமுதாயத்திற்கும் ஆகும்.

சிந்திக்கத் தெரிந்தவர்கள் தான் சாதனைச் சிகரத்தை எட்ட தெரிந்தவர்கள். ஒவ்வொருவருக்குள்ளும் அகப்பகையாகிய காமம், குரோதம், லோபம், மதம், மாச்சரியம்,மோகம் என்ற அகப்பகையும் இருக்கிறது. அன்பு, இரக்கம், கருணை, தர்ம சிந்தனை, என்ற நல்ல குணங்களும் இருக்கிறது. ஆனால், நல்லச் சிந்தனை மேலோங்கி தீயவை அழிக்கப்பட வேண்டும் என்றால் அதற்குப் பொறுமை அவசியம்.

நாணயத்திற்கு இரண்டு பக்கங்கள் இருப்பது போல் பொறுமைக்கு இரண்டு பக்கங்கள் உண்டு. ஒன்று சிந்திப்பது மற்றொன்று சாதிப்பது. ஆகவே, நாம் வாழ்க்கையில் சாதிப்பதற்குப் பொறுமை மிக மிக அவசியமாகும். நமது வாழ்க்கையில் நமக்குப் பெருமையைத் தேடித் தருவது பொறுமையாகும். இதுதான் அய்யா பொறுதிதான் என் மகனே பெரியோராகுவது என்கின்றார்.

இன்றைய காலச் சூழலில் பொறுமையைச் சோதிக்கும் விதமாகத் தான் மாய்கையாகிய கலியின் தாக்கம் இருக்கிறது. கலியின் தாக்கத்தால் மக்கள் ஆத்மஞானம் பெற முடியாமல் துன்புறுகிறார்கள். ஆன்ம ஞானம் பெற வேண்டும் என்று நாம் எண்ணினால் நாம் அந்த நிலையை அடைவதற்குப் பொறுமை அவசியம். ஒவ்வொரு மனிதனுக்கு இந்நிலை மாறுபடும். சிலர் சிறு வயதிலே ஆன்ம ஞானம் பெற்று விடுவார்கள். சிலர் பல சோதனைகளைத் தாண்டிப் பெறுவார்கள். இதற்குப் பொறுமை அவசியம்.

இவ்வாறு ஆன்ம ஞானம் விழிப்பு பெற்று இறைவனை நம்முள் உணர்வதற்குப் பல தடைகள் இந்தக் கலி வாழ்வில் வந்துக் கொண்டு தான் இருக்கும். அப்படிப்பட்டச் சூழலில் நாம் அதற்குக் காரணமானவர்களோடு மோதிப் பகைத்துக் கொள்ளக் கூடாது. போற்றுவதும், தூற்றுவதும் கவித்தன்மை என்பதை உணர்ந்து பொறுமையைக் கடைப்பிடித்து இறையருளைப் பெறுவதற்கு நாம் பொறுமையைக் கடைப்பிடிக்க வேண்டும். எப்படிப்பட்ட தீய எண்ணம் கொண்டவர்கள் எதிர்த்தாலும் நாம் பகை கொள்ளாமல் பொறுமையைக் கடைப்பிடிக்க வேண்டும்.

அய்யா உண்டு

அன்புக்கொடி சொந்தங்கள் அனைவருக்கும் அன்பு வணக்கம்: அன்பானவர்களே, தாங்கள் சார்ந்துள்ள தாங்கல் வரலாற்றை நமது தர்மயுக முரசு பத்திரிகையில் வெளியிட வேண்டும் என்றால் உங்கள் தாங்கலின் வரலாற்றை அழகாக எழுதி 0096893145654 என்ற வாட்சப் எண்ணிற்கு தாங்கலின் புகைப்படத்தோடு சேர்த்து அனுப்பி தாருங்கள். அதனை வருகின்ற மாதங்களில் நமது தர்மயுக முரசு பத்திரிகையில் பதிவு செய்து வெளியிடலாம்.

அய்யா உண்டு

எவர் ஒருவருக்கும் துன்பத்தையோ, தீங்கையோ, மன வேதனையோ தருகின்ற கொடிய வார்த்தைகளைப் பேசாதே என் மகனே. இனிமையும் நன்மையும் பொருந்திய நல்ல வார்த்தைகளை மட்டுமே எப்போதும் பேசியிரு என் மகனே.

இறைவன் எங்கும் நிறைந்தவன் எதிலும் இருப்பவன். அணுவுக்கும் அணுவாக இருக்கின்ற இறைவன் இல்லாத இடம் என்று எதுவும் இல்லை. உயிருள்ள மற்றும் உயிரற்ற பொருள் என அனைத்திலும் நிறைந்த இறைவன் நமது உயிருக்குள் உயிராக இருக்கின்றான்.

உயிருக்கு உயிராக இருக்கின்ற இறைவனை எங்கெங்கோ வெளியே தேடாமல் நமக்குள் இருக்கின்றான் என்பதை உணர வேண்டும். அதை விடுத்து கண்ட கண்டதை எல்லாம் கோயில் தெய்வம் என்று எண்ணி வணங்கினால் எந்த ஒரு பலனும் இல்லை.

காமமும் கோபமும் உயிர்களின் இயல்பான குணமாக இருக்கின்றது. எனவே இவற்றை வெல்வது என்பது எளிதில்லை என்ற போதிலும் வெல்வதை தவிர வேறு வழியில்லை. நாம் வெளிக்காட்டுகின்ற கோபம் நமக்குத் தீமையைத் தருமே அன்றி எக்காலத்திலும் நன்மையை ஏற்படுத்தாது.

அதனால் தான் திடீரென வருகின்ற கோபத்தை அடக்க வேண்டும் என்கிறார் நமது அய்யா. கோபம் எவ்வகையிலும் நமக்கு நன்மையைத் தராது, மாறாக தீமையையே விளைவிக்கும் எனும் உண்மையைப் புத்தியால் உணர்ந்து, கோபத்தை அடக்கி பொறுமையாக இருக்கின்றவரே பெரியவராக ஆக முடியும்.

இந்த பிரபஞ்சத்தின் கர்த்தனாகி ஸ்ரீமன் நாராயணரே உயிர் குலங்கள் அனைத்துக்கும் ஏக குருவாக இருக்கின்றான். அவனே பிறவி என்னும் கடலைத் தாண்டி கரையை அடைவதற்கு குருவாக இருக்கின்றான். அப்படிப்பட்ட நாராயணரை இன்பத்திலும் துன்பத்திலும் மறக்காமல் எப்பொழுதும் சிந்தையில் எண்ணி அவன் நினைவாகவே இருந்தால் அவன் திருப்பாதத்தை அடைகின்ற நற்பேறு கிடைக்கும்.

அய்யா உண்டு